جتني حروفي مسرجات مغيره | |
| عذب المعاني والعلوم الجزيله |
محد سهر ليله على هم غيره | |
| كل سرى يحمل همومه الثقيله |
الشعر لا هلت حروفه عبيره | |
| تحكي قوافيها صفات نبيله |
لا دلهمت بالكون وشبت سعيره | |
| وشدت عقدها والتوت بالجديله |
وطاشت نواظر بالعيون المحيره | |
| وغابت نواهيها بقل الوسيله |
يجيك عذب القاف صافي السريره | |
| ويجود بوحه كالمزون المخيله |
بعذب الكلام الي تلين العسيره | |
| ويلم شمل الي تفرق مسيله |
يأمن دخيل البيت جبر الكسيره | |
| لو كان له ثار يأمن دخيله |
كم شاعر فك الاسر من اسيره | |
| وكم شاعر ابرى عقول عليله |
حماة دين بالحروف المنيره | |
| في وجه طاغوت سيوفه سليله |
واليوم جانا الشعر ينفث زفيره | |
| صارت سوالف بالهروج الهزيله |
هذاك يتغزل براعي الظفيره | |
| وهذا كواه الوجد ودمعه هليله |
وهذا كسر بيت ولوى الجبيره | |
| وصف السوالف صف رجل هبيله |
اعرف مقاسك وخل عينك بصيره | |
| ومن شال فوق الحمل ينهد حيله |
والي وطانا واشعل الراس حيره | |
| شي طعنا بالغدر طعن غيله |
شي دهانا بالعلوم الخطيره | |
| وجه يجي بالخير وبالجوف ويله |
يسري بسمه في نعومة حريره | |
| يبيع فينا ويشتري بسوق ليله |
من حاد بالنيه على خط سيره | |
| وداج في خطه دروبه مهيله |
ومن ما يشوف الماء يسمع هديره | |
| ومن ما يذوق الكيف يشم هيله |
زيزوم تسمع في المواقف هديره | |
| شيخ اذا مال الزمن يرتكي له |
مقدم الشيخان وقت المسيره | |
| يسرج اصيل الخيل تسمع صهيله |
وطيره سرى بالليل يطلب غديره | |
| لقاه حصني داعبه ويرتجي له |
اغراه بعذوبة حروفه الوفيره | |
| وطاح في فخه وهو محتري له |
وسكن بداره في مفارش وثيره | |
| والطير لاهاه الحصيني بذيله |
والشيخ امن تسمعه من شخيره | |
| وما درى ان العار شب بشليله |
ومن على الشينه ينوخ بعيره | |
| يجيه رد الدين وعنده يكيله |
خافوا من الله يوم تسعر سعيره | |
| وتحمل ذنوبك فوق متنك تشيله |